HABE

Administrazioko izapideak modu elektronikoan sinatu

#

egilea: Izaskun Zuntzunegi Legarreta, 

Aspalditik daukagu dokumentuak lekutik mugitu gabe sinatzeko aukera, eta hasieran sistema berria zaila dirudien arren, behin ikasita, abantaila asko eskaintzen dituela ikusiko dugu.

Kontua ez da gure sinadura eskaneatzea eta dokumentu batean txertatzea: elektronikoki sinatzea hori baino zerbait gehiago da. Jarraian, prozesua urratsez urrats azalduko dugu.


Zergatik sinadura elektronikoa?

Eskuzko sinaduraren ordez, egokia da sinadura elektronikoa erabiltzea. Eskuz idatzitako sinaduraren lege-baliozkotasun bera du, baina askoz ere erosoagoa da. Gainera, ekonomikoa eta segurua da.

Zer behar dugu modu elektronikoan sinatzeko?

Lehenik eta behin, aipatu behar da PDF formatua duten dokumentuak bakarrik sina daitezkeela modu elektronikoan. Horrela, Word dokumentu bat sinatzeko, adibidez, lehenengo PDF bihurtu beharko dugu.

Bi baliabide hauek behar ditugu PDFak sinatzeko:

  • Ziurtagiri digitala

Autoritate ziurtagiri-emaile batek jaulkitako agiri elektronikoa da, zeinak fede ematen baitu sinadura elektroniko bat erabiltzaile jakin bati dagokiola. Elektronikoki sinatzeko eta jabea bere datuekin identifikatzeko beharrezko informazioa du ziurtagiri digitalak.

Ziurtagiri digitalaren abantaila nagusietako bat da izapide ugari egin ditzakegula mou seguruan eta fisikoki inora joan beharrik gabe.

Ziurtagiri digital hauek aukera ematen dute sinadura elektronikoaren sistema darabilten erakunde edo zerbitzu publikoen izapideak erraz eta azkar egiteko.

  • Ordenagailuko programa

Dokumentuak modu elektronikoan sinatzeko, beharrezkoa izango da ordenagailuan Acrobat Reader instalatuta izatea (edo PDFak zabaltzea ahalbidetzen duen beste programaren bat).

Dokumentu bat sinatu behar duzunean, programa horrekin dokumentua zabaldu eta digitalki sinatu ahal izango duzu. Aldea egon daiteke instalatuta duzun programaren arabera, baina bidea honako honen antzekoa izango da: Tresnak / Ziurtagiriak / Sinadura digitala

Hortik aurrera, programak eskatzen dizuna bete beharko duzu urratsez urrats, eta, azkenik, kurtsorearen bidez sinadura jarri nahi duzun tokia zehaztu. Ondoren, sinatzeko erabili nahi duzun ziurtagiria aukeratu ahal izango duzu (baldin eta bat baino gehiago badituzu; pertsonala edo profesionala, esate baterako), eta, azkenik, zure txartelaren edo ziurtagiri digitalaren pasahitza eskatuko zaizu.

Amaitzeko, programak zure sinadura txertatuko du. Sinadurak, oro har, sinatzailearen hainbat datu izan ohi ditu, baita kode alfanumeriko bat ere. Dokumentua dagoeneko bidaltzeko prest egongo da: sinatuta eta legezko baliozkotasunarekin. 


Kontuz sinadurako datuekin!

Ohikoa da sinaduran izena, sinaduraren data, NAN zenbakia… jartzea, baina Datuen Babeserako Legearen arabera, NAN eta sinadura datu pertsonalak dira, eta kontu handia izan behar dugu horiek argitaratzean.

Ez genuke NAN edo dokumentu baliokidearen zenbakirik argitaratu beharko, eta, eginez gero, ez genuke izen-abizenekin batera argitaratu beharko. Datu hori ematea ez da beharrezkoa gardentasun handiagoa lortzeko, sinatzailea identifikatuta lortzen baita.

Hori dela eta, sinadura egokitu beharko dugu data, ordua eta erakundearen logoa (txertatu badugu) bakarrik bistaratzeko moduan, datu pertsonalak babesteko oinarrizko eskubideak kontuan hartuta.